محاولات شعرية باللهجة السودانية العامية

منك كيفن اتوب ؟؟


منك كيفن اتوب ؟؟

وانت الحلم المن زمان سكيته في دروب الصحو ..

داريت عليه من العيون ..

رسمته لوحة فيها لونين سمرتك .. وحمار خدودي وسميته شوقي ...

كونتّك حزمة لهفة مربوطة بحكاوينا وأسرارنا وغناوينا ...

بقيت سهري ... ومعاك ودرّت طعم النوم ...

لو جاتك خاطرة عنيدة باني بعيدة ... فكّر تاني..

أحرق وهمك السارح .. وعاين فيك ...

شوف جواك ...ما حسيتني في بلعة ريقك ؟؟ في شيلة نفسّك وجوة شهقيك ؟؟

أنا ساكنة في عصبّك وفي تنهيدتك ..

مرات باتوسد إنسان عينك ...وكتير باسرح جوة حنينك ...

ما تفتشني كتير ولا تتعب ...

لما تدورني .. تاوق جواك ..

تلقاني هناك ... جنب نفاج مسارب الروح ..

شايلة خرايطك ارسم فيها خط سيري ..

أريتني أتوه و ألقى مكان ورا ضلوعك اسكن فيه أتمدد ..

باقول ليك يا مدار كوني ...

لو ريدك بقى ذنبي .. حأعيش بيه ..

وارفض منه استغفر ...

ولو شوقك بقى أثمي ...

حاقول ما عاوزة أتطهر ...