محاولات شعرية باللهجة السودانية العامية

أنا في رجاك

لما غبت ..غابت شمسي وكنت براي ..

قعدت استنى رحيل الليل الطال ...وبقيت اتمنى شروقك فيني ...

وأنا في رجاك ...

نضمت الصبر سبحة أعد حباتها ليك ونهار ..

اتمتم بيك بعد الله ورسول الله ...وانادي باسمك المحفور وشم جواي ...

وأنا في رجاك ...

غنيت الحزن مسدار ..ولبست الحنين طرحة...

لوكت المر ..صباح ومسا ..واتجرعت الغياب حنضل ..

وأنا في رجاك ...

ندهت الشيوخ بالدور...

شلت الفاتحة في حمد النيل ..

ومشيت حفيانة لود البرعي ...شايلة الحنة وموية زمزم...

وندرت بليلة لحيران الصايم ديمة ...

وأنا في رجاك ..

دائماً أسال ..

منو الهداك على الرحيل ؟؟..

وكيف حرثت خطاويك الدرب بدون خطاي ؟؟...

وليه غيابك يا مناي ؟؟...

ومتين رجوعك يا هواي ؟؟...