محاولات شعرية باللهجة السودانية العامية

يمنعني منك كيف ؟؟

يمنعني منك كيف ؟! ...

وأنا بارتجل الكلام من عمق الشجن ...

منجل سنين يحش ساجور الوجع ويفك قيود الاستباحة ...

من وين اجيك ؟!

كيف ابتديك ؟...
ومن ياتو باب ادخل عليك ؟؟!!

ادمنت شوقك في مداك
... رميت مراياتي البحبها.. وبعيونك اكتفيت ...

لو بتسال انت وين ؟؟!

انت جاري في عروقي .. وكل قطرة ملانة بيك ...

انت ساكن في مسامي ..

جلدي ريحتك .. عرقّي نفسّك ...

انت متوسد عيوني ..

لما تغمض ولما تفتح ... لما ترمش ولما تبكي ...

لو بتسال انت مين ؟؟!

انت فكرة سارحة في خيالات السنين ...

انت نطفة لسة تايهة بين تكون .. وما تكون ...

انت لحظة شوق بتسكن كل قلوب العاشقين ... انت ترنيمة مغني ..

منتظرة صوته عشان تبين ...

انت درويش لابس اخضر ...

قلبه اخضر
.. خطوته دوران حزين ..
أنت إيقاع الحنين ..
صمت إنسان غلبه الكلام ...
ضحكة يتيم زاره الفرح ...
بسمة حزين هجره الوجع ...
أنت توم الروح وروحها ...